Xukuumadda oo sheegtay in ay ahmiyad siinayso dib u habeynta hey’adaha Dowladda

Filed under: CIYAARAHA,dhacdooyinka,Faafan,WARARKA MAANTA |

R/wasaare ku xigeenka Dalka Mudane Mahdi Maxamed Guuleed(Qadar)  ayaa maanta Daah furay kulan lagu qiimeynayo,  dibna loogu eegayo  qaab dhismeedka iyo casriyeeynta hey’adaha Dowladda.

Kulankan oo lagu qabtay xarunta Akadeemiyada Cilmiga Fanka iyo Suugaanta waxaa ka qeybgalay,wasiirka Shaqada iyo arrimaha bulshada, guddoomiyaha guddiga Qaran ee Shaqaalaha Rayidka, Agaasimayaal, madax waaxeedyo iyo mas’uuliyiin ka socotay hey’adaha Dowladda.

Guddoomiyaha Akadeemiyada Cilmiga Fanka iyo Suugaanta oo kulankaasi ka hadlay ayaa codsaday in xafiisyada dowladda laga dhaqangeliyo afka Soomaaliga, isagoo tilmaamay in akadeemiyadu ay gogol u tahay hay’adaha dowladda.

Sidoo kale Guddoomiyaha gudiga Qaran ee Shaqaalaha Rayidka ah Xasan Abshiroow ayaa tilmaamay in dib u habeyn lagu sameeyay 10 hey’adood,  isagoo xusay in haddana la qorsheynayo in dib u habeyn lagu sameeyo hey’adaha kale ee dowladda si loo tayeeyo shaqada ay u hayaan bulshada.

Wasiirka shaqada iyo arrimaha bulshada ayaa sheegay in ujeeddada kulankan ay tahay tayeeynta hab maamulka hey’adaha dowladda.

Ugu dambeyntii R/wasaare ku xigeenka dalka Mahdi Maxamed Guuleed “Qadar” oo si rasmi ah u furay kulankaasi ayaa tilmaamay in xukuumaddu ay mudnaanta siineyso dib u habeynta hey’adaha, isagoo tibaaxay in sanadkan uu yahay sanadkii waxqabadka iyo fulinta.

Kulankan uu maanta furay R/wasaare ku xigeenka ayaa ah wajiga labaad qorshe ay dowladdu dib u habeyneyso qaab dhismeedka hey’adaha dowladda, Iyadoo xukuumaddu ku guuleysatay dhib u dhiska toban ka mid ah hey’adaha dowladda.

Leave a Reply

Your email address will not be published. Required fields are marked *